13 Aoqat jin main nawafil perhna Makroh hai

13 Aoqat jin main nawafil perhna Makroh hai:

Tuloo-e-Fajr sey tuloo-e-aftaab tak, es dooran siwai 2 rakat sunnat-e-FAJR k aur koi izafi namaz jaiz nahi, qaza-e-umri perh sakty hain. Tuloo-e-aftaab sey agly 20 minutes bhi makroh waqt k hain in main koi bhi namaz chahy FARZ he kyun na ho perhna MAKROH-e-tehreemi hai

-Masjid main jama'at k liay ikamat ho gai hai tou ikamat sey ley ker jama'at k khatam honey tak bhi nawafil perhna makroh-e-tehreemi hain, han ager fajr ka waqt hai aur maloom hai k SUNNAT adda ker k jama'at paa lon ga chahy jama'at ka qaida he kyun na paa ley, tou phir hukm yeh hai k pehly sunnat-e-FAJR adda kary phir jama'at main shamil ho.

-Namaz-e-asr k FARZ perhny k baad sey ghuroob-e-aftaab tak.

-Ghuroob-e-Aftaab sey FARZ-e-maghrib tak. Magr Imam Ibn-e-Alham ney 2 rakat khafeef ka ishtashna fermaya(yaani ijazat di).

-Duha-e-Kubra sey zawal tak k waqt main koi bhi namaz perhna makroh-e-tehreemi hai.

-Jumma k din jub IMAM apni jaga sey KHUTBA-e-jumma deiny k liay khara ho jai es waqt sey ley ker jumma k namaz khatam honey tak, yahan tak k jumma ki sunnatain bhi es dooran na perhi jaian, ager reh gai hain tou sub sey aakhir main yaani sunnat-e-badia adda kerny k baad perhian.

-Ain khutba k waqt, yaani jub imam KHUTBA dey raha ho, agerchy pehla ho yan dosra, jumma ka ho yan eidain ka, haj ka ho yan NIKAH ka, es dooran koi bhi namaz chahy wo qaza namaz he kyun na ho, perhna makroh hai, laikin ager sahib-e-terteeb hai tou us k liay ijazat hai k qaza namaz perhy.

-Namaz-e-Eidain sey pehly nawafil perhna makroh hain, chahy wo gher main perhy yan eid gah main.

-Namaz-e-Eidain k baad nawafil perhna makroh hai, laikin tub jub masjid main perhy, gher main perhna jaiz hai

-Meidan-e-arafat main jo Zohr-o-Asr mila ker perhty hain, in k dermiyan aur baad main nafal-o-sunnat makroh hain.

-Muzdalifa main maghrib-o-esha mila ker perhty hain, in k dermiyan main nafal perhna makroh hai, baad main makroh nahi.

-Farz namaz ka waqt tang ho yaani koi nafal yan sunnat perha tou FARZ qaza ho jaian gey tou koi bhi sunnat aur nafal namaz perhna makroh hai.

-Jis cheez ko doar ker sakta hai es ka khayal liay yan es ka asr liay namaz perhna makroh hai, jeisy peeshap, pakhana yan reeh ki shadeed hajat hai, phir bhi namaz perhta hai tou makroh hai, eshe terhan khana samney hai aur es ka khayal dil main hai laikin namaz shuru ker deita hai tou yeh bhi makroh hai, laikin itna waqt hona chahiyay k farigh ho ker aajai tou waqt baaqi ho. Eshe terhan jo dunyawi khayalaat aaty hain in ko doar kerny per qudrat rukhta hai tou pehly doar kary.

(Fazail-e-Dua, Page:61-62)